Të paktën 30 personave i “pushon zemra” nga shpërthimi i një vullkani

Një ditë pas shpërthimit të një vullakni në qendër të Japonisë, katastrofë që ka bllokuar shumë alpinistë, pritet të ketë një bilanc të rëndë, ku më shumë se 30 persona janë me “zemrën e pushuar”.

“Kemi konfirmuar se mbi 30 personave nuk i reh më zemra, dhe janë gjendur pranë majës”, deklaroi zëdhënësi i policisë së prefekturës së Naganos, por pa dhënë më shumë detaje.

Forcat e shpëtimit përdorin termin “pushim zemre” për të përshkruar viktimat që nuk japin më asnjë sinjal jete. Ky term përdoret shpesh nga autoritetet japoneze në pritje që mjekët të paraqesin çertifikatën e vdekjes.

Disa dhjetëra persona janë plagosur, nga gurët dhe hiri. Shtatë prej tyre u shpëtuan me helikopter nga forcat ushtarake që u dërguan menjëherë në terren nga qeveria.

Vullkani “Ontake”, që është i lartë 3 067 metra dhe ndodhet mes prefekturave të Naganos dhe Gifusë, u zgjua fuqishëm dje në mesditë, duke nxjerrë re tymi, hi dhe gurë.