Tirana i përgjigjet Shkupit: Zbatoni Ohrin, lërini ankesat!

Ministria e Jashtme thërret ambasadorin e Maqedonisë në Shqipëri

Tirana nuk i konsideron ndërhyrje në punët e brendshme qëndrimet e shprehura dhe i kërkon Shkupit që të ofrojnë zgjidhje me maturi

Ambasadorit maqedonas iu tha se shkaqet e këtyre situatave duhen kërkuar brenda Maqedonisë dhe te moszbatimi i Marrëveshjes së Ohrit

Nota e protestës së Republikës së Maqedonisë ndaj Shqipërisë dhe Kosovës, nuk është përtypur mirë as në Tiranë e as në Prishtinë, që i janë përgjigjur me të njëjtën monedhë Shkupit. Dy ministritë e Jashtme, ajo e Shqipërisë dhe e Kosovës, kanë thirrur ambasadorët respektivë të Maqedonisë për t’u paraqitur shqetësimet në mënyrë të drejtpërdrejtë mbi zhvillimet që kanë irrituar komunitetin shqiptar pas vendimit të gjyqit “Monstra”.

“Ministria e Punëve të Jashtme e Republikës së Shqipërisë thirri në takim ambasadorin e Republikës së Maqedonisë në Tiranë për t’i shprehur keqardhjen dhe pakënaqësinë për moskuptimin e mesazheve të përcjella nëpërmjet deklaratave të zyrtarëve shqiptarë, referuar zhvillimeve të fundit në Maqedoni. Ambasadorit iu rishpreh shqetësimi për dhunën e ushtruar gjatë demonstratave. MPJ theksoi se kjo mënyrë sjelljeje nuk ndihmon në zbardhjen e çështjes, dëmton marrëdhëniet ndëretnike e harmoninë midis komuniteteve. Për më tepër, qëndrimet e Republikës së Shqipërisë janë në të njëjtën linjë me shqetësimin e shprehur nga faktori ndërkombëtar. Republika e Shqipërisë mbetet e angazhuar dhe ka shprehur në mënyrë sistematike mbështetjen për sovranitetin dhe integritetin territorial të Maqedonisë”, thuhet në njoftimin për shtyp të MPJ-së.

Tirana zyrtare nuk i konsideron ndërhyrje në punët e brendshme qëndrimet e shprehura deri tani, si dhe i kërkon Shkupit që të ofrojë zgjidhje me maturi. “Ambasadorit iu vu në dukje se këto deklarata nuk mund të konsiderohen si ndërhyrje në punët e brendshme të Maqedonisë. Ato përbëjnë një shprehje të natyrshme të shqetësimit për situatën e krijuar dhe njëkohësisht bëjnë thirrje për maturi dhe gjetjen e zgjidhjeve. Republika e Shqipërisë është e interesuar për ndërtimin e marrëdhënieve të fqinjësisë së mirë me Maqedoninë, bazuar në parimet e respektit të ndërsjellë. Ambasadorit maqedonas iu theksua se kemi përshtypjen se nota verbale e MPJ të Maqedonisë është më shumë një përpjekje për të zhvendosur vëmendjen nga thelbi i çështjes. Jemi të mendimit se shkaqet e këtyre situatave duhen kërkuar brenda Maqedonisë dhe te moszbatimi i Marrëveshjes së Ohrit. Çdo përpjekje për të kërkuar shkaqe apo faktorë të tjerë dhe për më tepër jashtë kufijve të Maqedonisë, do të ishte joproduktive. Republika e Shqipërisë e konsideron zbatimin në frymë dhe në germë të Marrëveshjes së Ohrit si shtyllën kryesore të shtet-ndërtimit demokratik dhe busull orientuese për të ardhmen euroatlantike të Maqedonisë. Marrëdhëniet e fqinjësisë së mirë dhe të bashkëpunimit reciprok kërkojnë mirëkuptim dhe përpjekje të përbashkëta. Shqiptarët e Maqedonisë janë jo vetëm një urë bashkëpunimi, por faktor shtet-ndërtues me një rol të rëndësishëm në stabilitetin e Maqedonisë dhe të rajonit”, thuhet në deklaratën mbi takimin me ambasadorin Stojan Karanajov. Protestat dhe dhuna e ushtruar ndaj shqiptarëve kanë qenë objekt i diskutimit mes ministrit Ditmir Bushati dhe homologut të tij Maqedonisë. Sipas “Top Channel”, Bushati i ka përcjellë shqetësimet homologut Popovski për ngjarjet e Shkupit gjatë Forumit Rajonal në Kotorr dhe më pas në atë të Dubrovnikut, në një takim “tet a tet”.