Tusk: Marrëveshje e mundshme për planin grek para fundit të muajit prill

Presidenti i Këshillit të Evropës, Donald Tusk theksoi sot se situata ekonomike e Greqisë mbetet nën kontroll duke shprehur gjithashtu se një marrëveshje me kreditorët nuk do të arrihet para Pashkëve duke mbetur e mundshme para fundit të muajit prill.

“Procesi i vlerësimit të planit grek është shumë kompleks dhe nuk parashikoj zhvillime para Pashkëve”, deklaroi Donald Tusk në një konferencë shtypi me kryeminsitrin spanjoll, Mariano Rajoy

Athina arriti më 20 shkurt një marrëveshje me kreditorët që parashikon zgjatjen me katër muaj të dhënies së kredive ndërkombëtare, por që varet ende nga një plan grek reformash që po diskutohet në Bruksel.

“Mund të themi sot se situata e Greqisë është nën kontroll”, deklaroi Tusk në kuadër të një turneu në Maltë, Spanjë dhe në Tunizi.

“Shpresoj që të arrijmë në një marrëveshje deri në fund të muajit prill, kjo më duket e mundshme”, theksoi ai.

Mariano Rajoy theksoi nga ana e tij se shpresonte që këto negociata të përfundojnë me sukses dhe që Greqia të mbetet në zonën euro.

”Greqia duhet të kuptojë se për Bashkimin Evropian është e rëndësishme që rregullat e lojës duhen respektuar”, shtoi Rajoy.