Uashingtoni i kërkon Rusisë dhe separatistëve ndërprerjen e menjëhershme të sulmeve në Ukrainë

SHBA-ja i kërkoi Rusisë dhe rebelëve separatistë ndërprerjen e menjëhershme të sulmeve në lindje të Ukrainës duke shprehur shqetësimin e saj të madh për shkeljen e armëpushimit.

“SHBA-ja shpreh shqetësimin e saj të madh për përkeqësimin e situatës në Debaltseve dhe rrethinat e saj, në lindje të Ukrainës”, theksoi zëdhënësja e Departamentit të Shtetit, Jennifer Psaki në një komunikatë.

“Ne i kërkojmë Rusisë dhe separatistëve të ndërpresin menjëherë të gjitha sulmet”, shtoi ajo.

Armëpushimi më 12 shkurt ishte shumë i brishtë ndërkohë që luftimet vazhdonin rreth nyjës hekurudhore të Delbatseves dhe asnjëra prej palëve nuk nisën në mbrëmje tërheqjen e armëve të rënda nga linja e frontit ashtu si parashikohej në marrëveshjen nënshkruar në Minsk.

Sulmet kanë qenë më të dhunshme në qytetin e Debaltseves, qytet kyç mes Donetskut dhe Luganskut, dy bastione separatiste proruse ku mijëra trupa të ushtrisë ukrainase janë të rrethuar nga rebelët.

“Ne i kërkojmë Rusisë dhe separatistëve të kontaktojnë me OSBE-në për lehtësimin e armëpushimit (…) për zbatimin e plotë të angazhimeve të tyre të marra më 5 dhe 19 shtator në Minsk”, nënvizoi zëdhënësja e SHBA-së.