Unifikimi i ligjeve të investimeve

Qeveria shqiptare ka paralajmëruar rishikimin terësor të ligjeve për investimet në vend përmes hartimit të një ligji të unifikuar.

Ky hap paralajmërohet në udhërrëfyesin e investimeve të miratuar nga Këshilli i Ministrave pak javë më parë. Megjithatë, procesi duket se do të zgjasë në kohë e ligji i ri i unifikuar sëbashku me mekanizmat që do të trajtojnë problematikat e investitorëve do të jenë gati vetëm në fillim të vitit 2018. Referuar udhërrëfyesit të investimeve, procesi për rishikimin e bazës ligjore për invetsimet ka nisur në korrik të këtij viti me ngritjen e grupit të punës.

Më pas procesi do të vijojë me rishikimin e ligjit për investimet e huaja, ligjit për investimet strategjike, ligjin për marrëveshjet ndërkombëtare si dhe ligjet e rregulloret për zonat e lira ekonomike, partneritetin publikprivat etj.

Krahas ligjit të ri për investimet, qeveria paralajmëron se do të marrë masa edhe për përmirësimin e besimit të investitorit duke krijuar mekanizma për ruajtjen apo mbajtjen e investimeve. Në këtë kuadër, qeveria shqiptare do të krijojë mekanizma, të tilla si procedura për ndjekjen e trajtimit të ankesave të investitorëve dhe një sistem për trajtimin e ankesave të investitorëve.

Në këtë mënyrë, sipas qeverisë, synohet të rritet besueshmëria e investitorëve e të nxitet zgjerimi i investimeve tek investitorët ekzistues. Hartimi i ligjit të unifikuar të investimeve e krijimi i mekanizmit të ankesave kanë si afat dhjetorin e vitit të ardhshëm ndërsa miratimi i tyre, shkurtin e vitit 2018.