Vajzat Bush, letër me këshilla për vajzat Obama
Ndërsa Sasha dhe Malia Obama po përgatiten të largohen nga Shtëpia e Bardhë, pas 8 vitesh qëndrimi atje, Jenna Bush Hager dhe Barbara Bush, u kanë shkruar atyre një letër me këshilla.
Ashtu si edhe vajzat Obama, motrat Bush kaluan një pjesë të madhe të viteve të tyre të formimit, në Shtëpinë e Bardhë. Kur gjyshi i tyre George H. W. Bush, bëri betimin si presidenti i 41 i SHBA, në 1989, binjaket Bush ishin vetëm 7 vjeç.
E kur babai u betua si presidenti i 43-të në 2001, ato ishin 19 vjeçare. Ndaj, kur Barack Obama u ul në detyrë në 2009-ën, vajzat e para në largim kishin vite këshilla për të ndarë, dhe këtë e bënë në një letër që lexuan në “Today Show”.
Tani, ndërsa koha e Obama-ve në Shtëpinë e Bardhë po mbaron, binjaket Bush kanë edhe disa këshilla të tjera.
Letra, që është publikuar nga “Time”, i dedikohet viteve që vajzat Obama kaluan në Shtëpinë e Bardhë dhe mënyrës së si ato u rritën gjatë kësaj kohe.
“Në tetë vite ju keni bërë shumë. Keni parë shumë. Keni qëndruar në portat e ishullit Robben, ku Nelson Mandela qëndroi i burgosur për dekada, keni udhëtuar në Liberi e Marok, keni folur me vajzat atje për rëndësinë e edukimit, vajza që tek ju shihnin veten, që tek ju shihnin se kush mund të bëheshin nëse vazhdonin të mësonin”.
Në letrën e 2009-ës, motrat Bush këshillonin vajzat Obama për atë që duhej të bënin, të shikonin dhe të arrinin gjatë qëndrimit të tyre në Shtëpinë e Bardhë, ndërsa letra e fundit, ka një ton të ndryshëm, pasi shikon tek e ardhmja e motrave Obama si ish-vajza të para dhe si gra të pjekura.
“Tani, do t’i bashkoheni një tjetër klubi të rafinuar, atij të fëmijëve të parë, një pozicion që nuk e keni kërkuar dhe që nuk ka rregulla të shkruara. Por, keni shumë për të bërë, do shkruani historitë e jetëve tuaja, përtej hijes së prindërve të famshëm, e në çdo hap, do të mbani me vete eksperiencat e tetë viteve të kaluara”.
Motrat tashmë 35-vjeçare vazhdojnë më tej duke përdorur edhe nota humori. “Gëzohuni kolege, tani nuk keni pse ta ndjeni më peshën e fjalës. Eksploroni pasionet tuaja. Mësoni kush jeni, bëni edhe gabime, tani ju lejohet…”
Motrat Bush, që kanë mbështetur Obama-t që kur Sasha dhe Malia ishin 7 dhe 10 vjeç, kanë edhe një kujtesë të fundit…”Ju qëndruat në këmbë kur prindërit shfaqeshin në faqet e para të gazetave. Prindërit tuaj ju vunë ju të parat e jo vetëm jua treguan por edhe jua dhanë botën. Si gjithmonë, ata do të jenë pranë jush, edhe në këtë kapitull të ri. Po kështu edhe ne…”
