Venezuelë, thellohet kriza; 3 të vrarë në protestat anti-qeveritare

Të paktën tre persona kanë mbetur të vrarë në Venezuelë, në protestat që po zhvillohen kundër qeverisë së presidentit Nicolas Maduro.

Një adoleshent në Karakas dhe një grua në San Kristobal, në afërsi të kufirit me Kolumbinë, u qëlluan për vdekje. Ndërkohë, një anëtar i Gardës Kombëtare mbeti i vrarë në kryeqytet.

Disa dhjetëra mijëra persona janë mbledhur për të kërkuar zgjedhje të reja presidenciale dhe lirimin e politikanëve të opozitës, të cilët mbahen në burg.

Nga ana e tij, presidenti Maduro akuzon opozitën se po sulmon policinë. Ai i akuzon ata edhe për plaçkitjen e dyqaneve, duke thënë se mbi 30 arrestime janë kryer në lidhje me këto akte.

Ndërkohë, mbështetësit e qeverisë mbajtën një miting rival në Karakas. Ndërsa lideri i opozitës, Henrique Capriles ka bërë thirrje për protesta të mëtejshme.

Pavarësisht se ka rezervat e naftës më të mëdha në botë, Venezuela vuan prej shumë vitesh nga inflacioni i lartë, kriminaliteti dhe mungesa e nevojave bazë për qytetarët.

Protestat që kanë përfshirë vendin janë më të mëdhatë në tre vitet e fundit, duke shtuar presionin mbi presidentin Maduro për të negociuar me opozitën dhe për të lehtësuar krizën ekonomike të vendit.