Veseli: Shqiptarët, populli i vetëm në Ballkan që mbajtën gjallë krishtërimin katolik

“Shqiptarët janë populli i vetëm në Ballkan që kanë mbajtur gjallë krishtërimin katolik, edhe përkundër vështirësive të mëdha dhe se në momente të vështira për popullin tonë”,   theksoi sot Kryetari i Kuvendit, Kadri Veseli, gjatë një takimi me Juliusz Janusz, delegat apostolik i Vatikanit për Republikën e Kosovës.

Në takim u bisedua për një sërë çështjesh që kanë të bëjnë me marrëdhëniet mes Kosovës dhe Selisë së Shenjtë.

“Selia e Shenjtë e ka mbështetur Kosovën, sidomos në vitet ’90, nën drejtimin e Papa Gjon Palit të Dytë”, tha Veseli.

Delegati apostolik i Vatikanit për Republikën e Kosovës, Janusz, theksoi se Selia e Shenjtë e njeh realitetin e ri në Kosovë dhe mbështet zhvillimet pozitive.

Në këtë kontekst, ai shtoi se ne i përcjellim zhvillimet në Kosovë, e cila ka një potencial të madh zhvillimi me faktin se ka një popullatë të re.

Në takim u bisedua edhe për çështjen e pranimit të Kosovës në UNESCO dhe me këtë rast kryetari Veseli kërkoi mbështetjen e Vatikanit për anëtarësimin e Kosovës në këtë mekanizëm shumë të rëndësishëm ndërkombëtar.

Delegati papal, nga ana e tij, u shpreh se Selia e Shenjtë ka mirëpritur letrën e përbashkët të bashkësive fetare të Kosovës, ku i kërkohet kësaj Selie mbështetja për këtë anëtarësim. Më tutje ai shtoi se populli shqiptar ka një traditë të fuqishme të tolerancës, bashkëjetesës e bashkëpunimit mes religjioneve, e se mesazhi i kësaj tradite është i njëjtë me mesazhin qendror që synon të përçojë sot në botë edhe vetë Kisha Katolike nën drejtimin e Papa Françeskut.

Takimi i sotëm i kryetarit Veseli me delegatin papal është i pari i këtij niveli që ka pasur Kuvendi i Kosovës me Selinë e Shenjtë.