”Volkswagen”-i pezullon shitjen e automjeteve

Gjiganti i automobilave “Volkswagen” pezulloi sot shitjen e disa markave të makinave me motor diezel në Australi, për shkak të përfshirjes në rang global të një skandali që ka përfshirë motorët e trukuar të prodhuesit gjerman.

”Volkswagen Grup Australia” (VGA) është shprehur në një komunikatë se ka takuar ditën e djeshme autoritetet për t’i informuar rreth strategjisë së kompanisë në Australi me synim për të adresuar shqetësimet që lidhen me teknologjinë e motorëve të përfshirë në skandal.

“Fillimisht me efekt të menjëhershëm, VGA-ja ka pezulluar shitjen e automjeteve të pajisura me motorë dizel 1,6 ose 2 litra EA189”, shtoi firma.

“Audi Australie” njoftoi paraprakisht se ka pezulluar përkohësisht shitjen e automjeteve që janë të pajisur me këto lloj motorësh.

Gjiganti i automobilave gjermane “Volkswagen” pranoi javën e kaluar se ka zbatuar një sistem trukimi në rreth 11 milionë automjete në mbarë botën, e aftë për të ndryshuar testet kundër ndotjes. Përfshirja në këtë skemë skandali e ka detyruar të zëvendësojë kreun e grupit, dhe të vërë mënjanë 6,5 miliardë euro për të përballuar gjobëvëniet e mundshme si dhe të përballojë procedurat e hapura gjyqësore në shtete të shumta të globit.