Vrasja e Jakut, OSHEE: Akt kriminal, nuk ka qenë kurrë i dënuar
Operator i Shpërndarjes së Energjisë Elektrike (OSHEE) dënon me forcë aktin kriminal, me pasojë vdekjen e punonjësit, Sajmir Jaku, ndodhur sot në Rrëshen.
Sipas një njoftimi të shpërndarë për mediet, OSHEE sqaron se Saimir Jaku, i moshës 33 vjeç, deri më datën 31.08.2016 ka mbajtur detyrën e Drejtorit të Njësisë së Tensionit të Lartë, Veri.
“Sqarojmë se, më datën 01.09.2016, është transferuar në Drejtorinë e Tensionit të Lartë në Tiranë në pozicionin Shef Sektori i Asistencës Teknike SCADA + GIS / Dega Teknike, nga ku kryente detyrën normalisht deri në ditën e sotme”.
Po ashtu, OSHEE, bën të ditur se viktima nuk ka qenë asnjëherë i dënuar më parë, siç pretendonte ish-kryeministri Berisha përmes publikimit të një statusi kohë më parë në “Facebook”.
“Në lidhje me deklaratat e deputetit të PD-së, Sali Berisha, OSHEE kërkon të sqarojë gjithashtu se “dëshmia penale” lëshuar nga Ministria e Drejtësisë dhe formulari i dekriminalizimit, plotësuar nga z.Jaku, tregojnë se punonjësi nuk është dënuar për vepra penale. OSHEE i shpreh ngushëllime familjes dhe u bën thirrje organeve të drejtësisë të zbardhin sa më parë ngjarjen kriminale”.
