Vritet autori i dyshuar i dy sulmeve në Kopenhagë
Policia e Kopenhagës njoftoi sot se mendonte se kishte vrarë autorin e dyshuar të dy sulmeve që shkaktuan dy të vdekur dhe pesë të plagosur në kryeqytetin danez.
“Ne mendojmë se bëhet fjalë për të njëjtin person, i cili është autori i dy sulmeve”, theksoi një zëdhënës i policisë, Torben Moelgaard Jensen, në një konferencë shtypi.
Autori i dyshuar hapi zjarr ndaj forcave të sigurisë.
Gjatë sulmit të parë, rreth orës 15:00 GMT, një person ka hapur zjarr kundër një qendre kulturore ku po zhvillohej një debat mbi islamizmin dhe lirinë e shprehjes duke shkaktuar një të vdekur dhe duke plagosur tre policë.
Ndërsa në sulmin e dy një hebre u vra dhe dy policë u plagosën pranë një sinagoge në Kopenhagen.
Ndërkohë, autoritetet daneze kanë nisur hetimet për të zbardhur nëse personi i vrarë në operacionin masiv policor që pasoi sulmet vepronte i vetëm apo është ndihmuar nga të tjerë që mund të paraqesin rrezikshmëri për sigurinë e vendit.
