Vulin “i vë pikën” çështjes së njohjes së pavarësisë së Kosovës

Ministri i Punës, Punësimit dhe Çështjeve Sociale në Qeverinë e Serbisë, Aleksandar Vulin ka deklaruar se njohja e shtetit të Kosovës as që vjen në diskutim.

Ministri ka shtuar se deklarata e nënkryetares së Parlamentit Evropian, Ulrike Lunacek, përfaqëson një qëndrim personal dhe jo institucional.

“Kjo është një formë e presionit, jo një qëndrim institucional. Është një qëndrim personal, i një funksionari, i cili nuk mund të flasë në emër të institucioneve evropiane”, u ka thënë Vulin gazetarëve në Beograd.

“Rreth kësaj kemi folur edhe në fillim të punës së Qeverisë dhe nga kjo asgjë nuk ka ndryshuar dhe nuk do të ndryshohet. Po të donim, deri tani do ta njihnim pavarësinë e Kosovës, por sigurisht që nuk kemi dashur ta bëjmë”, ka shtuar Vulin.

Ai ka thënë se rruga e Serbisë drejt BE-së nuk kalon nëpërmjet Kosovës, vetëm se rreth 35 kapitujve, njëri nga të cilët ka të bëjë me Kosovën. “Pavarësinë e Kosovës nuk do të njohim dhe pikë”, ka porositur Vulin.

Lunacek, para disa ditësh kishte thënë se normalizimi i marrëdhënieve me Kosovës dhe në fund pranimi i saj do të jetë një kusht i hyrjes së Serbisë në BE, duke shtuar se rreth kësaj nuk ekziston ndonjë dokument, por se është një “konsensus politik”.