Xhafaj: Vettingu e ka kaluar testin kushtetues, të zbatohet

Kryetari i Komisionit të Ligjeve Fatmir Xhafaj gjatë një bashkëbisedimi me gazetarët deklaroi se “nëse procesi i Vettingut nuk do të kryhet në kohë do të krijojë pasoja të drejtpërdrejta për ngritjen e institucioneve të reja të sistemit të drejtësisë”.

Xhafa iu referua Këshillit të Lartë të Prokurorisë dhe Këshillit e lartë të Gjyqësorit, sepse këta kanë një afat të limituar nga kushtetuta. “Kjo është arsyeja pse konsiderohet tejet i rëndësishëm Vettingu“.

Sipas Xhafajt Vettingu e ka kaluar testin kushtetues dhe procesi ka filluar, prandaj duhet të nisë zbatimi dhe të nisë faza tjetër ngritja e komisioneve të Vettingut.

Nga 164 aplikantë 85 rezultojnë më rekomandim negativ nga ONM dhe 79 janë të mundshëm për të qenë në listën e personave që plotësojnë kriteret formale, tha ai.

Sipas Xhafajt procesi i Vettingut duhet të jetë i ligjshëm në çdo hap.

Pasditen e djeshme parlamenti vendosi t’i kërkojë Avokatit të Popullit të rihapë edhe njëherë garën për të plotësuar numrin e kandidatëve për anëtar që do të jenë pjesë e komisioneve që do të bëjnë Vettingun e gjyqtarëve dhe prokurorëve.