Gabriel: Duhet demarkacioni nëse doni lëvizjen e lirë në Europë
Ministri i Jashtëm gjerman, Sigmar Gabriel deklaroi në konferencën e përbashkët për shtyp me kryeministrin e Kosovës Isa Mustafa se duhet ratifikuar Marrëveshja e Demarkacionit nëse Kosova dëshiron lëvizjen e lirë në Europë.
Mesazhet e shefit të diplomacisë gjermane për deputetët kosovarë ishin të qarta. “Nëse BE-ja ka vendosur që ky të jetë kushti për liberalizim, atëherë kjo duhet të plotësohet nëse e doni lëvizjen pa viza”, ishte komenti i tij. Gabriel shtoi se duhet të bëhet më shumë përsa i takon zhvillimit të projekteve të infrastrukturës mes Kosovës, Serbisë dhe rajonit.
Gabriel mbërriti sot në Prishtinë, ku u prit në aeroport nga ministri i Jashtëm i Kosovës, Enver Hoxhaj.
Të mërkurën, Gabriel ishte në Beograd, ndërsa të hënën mbërrin në Tiranë. Qëllimi i këtij rrugëtimi, siç ka pohuar ai vetë, është të sigurohen vendet e Ballkanit Perëndimor në rrugën e tyre drejt funksionimit të shtetit juridik, stabilitetit dhe mirëqenies. Gabriel kërkon të përcjellë garancitë se rruga e anëtarësimit në BE për këto shtete mbetet e hapur, nëse bëjnë përparime dhe vazhdojnë të realizojnë reformat, në vend të tendosjeve dhe përçarjeve.
