Beogradi merr një kërkesë për transferimin e Shesheljit në Hagë
Ministria serbe e Drejtësisë mori një kërkesë nga Gjykata Penale Ndërkombëtare për ish-Jugosllavinë (TPIY) duke kërkuar rikthimin në burg më 26 maj, ose në kohën më të shkurtër, të ultranacionalistit serb, Vojislav Sheshelj, në liri të përkohshme që prej muajit nëntor, bnë të ditur sot burime zyrtare.
“Ne kemi marrë këtë kërkesë që përmend datën e sotme 26 maj për rikthimin e Shesheljit në Hagë. Tashmë ajo do të shqyrtohet nga qeveria që do të vendosë për masat që do të marrë”, sipas një burimi nga Ministria e Drejtësisë, që konfirmon një informacion të shtypit lokal.
Ministri serb, i ngarkuar për bashkëpunimin me Gjykatën Penale Ndërkombëtare për ish-Jugosllavinë (TPIY), Rasim Ljajic, theksoi për gazetën ”Blic” se nuk ishte i mundur rikthimi i Shesheljit që prej ditës së sotme në Hagë.
“Është e pamundur që Sheshelj të transferohet më 26 maj. Ne jemi lidhur nga ligji për bashkëpunimin me TPIY-në që përcakton afate specifike. Nëse Sheshelj është arrestuar, ekzistojnë procedura për të ndjekur (…) që zgjasin rreth 10-15 ditë.
TPIY-ja urdhëroi në muajin mars rikthimin në burg të Shesheljit, pasi kishte deklaruar disa herë se refuzonte të paraqitej para kësaj gjykate.
Lideri ultranacionalist u rikthye në Serbi në mes të muajit nëntor pas 12 viteve në një burg të TPIY, ku u gjykua për krime lufte.
