10 net me kinemanë italiane

Romancat e Gianni Amelios, të Carlo Mazzacurat-it ose të emrave të tjerë të njohur nga kinemaja italiane, do të mund të shihen në teatrin e hapur pranë Universitetit të Arteve çdo të mërkurë deri më 2 shtator. Ky event ka si qëllim të krijojë më shumë atmosferë për mbrëmjet verore, duke sjellë kinemanë më pranë publikut. Por në ekranin e madh në skenën e Akademisë së Arteve do mund të shihet edhe filmi shqip. përpara çdo filmi italian, është menduar të shfaqet një prodhim nga filmat e shkurtër shqip, të studentëve të Akademisë së Arteve. Kjo është një formë e mirë për të prezantuar këto prodhime, por edhe për të parë tendencat e filmit të shkurtër shqip. Përgjatë këtyre netëve të gjata do të shfaqen filma si “Plani” nga Altin Ago, “Cice” nga  Simeon Daberdaku, “Pa shpresë” nga Eros Çaushi, “Pallati im” nga Armand Vllahu, “Ajo Ditë” nga Zamir Kamberi, “Ngrini Duart Lart Sikur do të Kapni Diçka të Mrekullueshme” nga Regis Canameri, “11′ Keno” nga Ergys Peqini, “Shpirtra të Ngjashëm” nga Altin Çelmeta, “Ana” nga Ani Meziri dhe “Preja” nga Neritan Gjiksana.