Mediat serbe dhe Bërnabiç bëjnë “hero” Vuçiçin: Historike ajo që bëri në Tiranë, i heqim kapelen

Edhe vetë Vuçiç u mburr në intervistë për këtë arritje, por edhe për faktin se është hequr nga kjo deklaratë përcaktimi si “shtete” për vendet pjesëmarrëse, duke qenë se Serbia nuk e njeh Kosovën si të tillë.

Mediat serbe i kanë bërë jehonë deklaratës së Vuçiç duke shkruar se Presidenti nga kryeqyteti shqiptar ua bëri të qartë të gjithëve se Beogradi zyrtar do ta mbrojë Kosovën me çdo kusht.

Ndërkohë, kryeministrja serbe Ana Bërnabiç intervistën e mbrëmjes në TV Prva e ka nisur duke folur për pjesëmarrjen e Vuçiç në samitin e Tiranës, duke thënë se me angazhimin e tij arriti një rezultat të madh dhe historik, duke ndryshuar deklaratën finale.

“Nëse kjo nuk do të ishte pranuar, atëherë krahina jonë autonome e Kosovës do të shfaqej atje si një vend pjesëmarrës në samit. Presidenti ka insistuar për këtë dhe ka arritur ta ndryshojë, ta heqë atë pjesë. Kështu, në një ditë jashtëzakonisht të rëndësishme në një samit jashtëzakonisht të rëndësishëm, ne praktikisht e hoqëm atë nga të gjitha dokumentet dhe deklaratat dhe konfirmuam sovranitetin tonë. Është një arritje e madhe në rrethana të vështira“, tha Bërnabiç.

Sipas saj, heqja e atyre pjesëve dhe formulimeve nga deklarata paraqet një sukses të madh diplomatik të Serbisë. “Kur presidenti Vuçiç nisi të shtjellonte të gjitha këto, ata ndoshta e kuptuan se ishte më e lehtë ta hiqnin termin shtet nga rezoluta”, u shpreh ajo.

Sipas Bërnabiç ajo që ndodhi sot në Tiranë është një nga gjërat më të vështira që Vuçiç bërë kohët e fundit dhe kjo do të mbetet në histori, ndaj “duhet hequr kapelja” për të.