25 të vdekur nga sulmet në kryeqytetin somalez

Ka arritur në 25 numri i të vdekurve, si rezultat i sulmeve të së premtes në një hotel në Mogadishu, kryeqytetin e Somalisë.

Sipas një njoftimi të qeverisë të lëshuar sot, në mesin e viktimave janë edhe dy ligjvënës dhe një punonjës të zyrës së kryeministrit.

Sulmet kanë ngjarë të premten brenda kompleksit të hotelit Central i cili gjendet në afërsi të pallatit presidencial në Mogadishu.

Rebelët islamikë nga grupi al-Shabaab i kanë kryer sulmet duke vendosur një makinë bombë brenda kompleksit të hotelit, transmeton REL.

“Numri i konfirmuar i të vdekurve ka arritur më 25”, ka njoftuar qeveria.

Përveç të vrarëve, rreth 40 persona të tjerë janë plagosur nga dy shpërthimet që kanë ngjarë.

Në mesin e të plagosurve lehtë janë edhe dy ministra somalezë.