Aksident i rëndë në Tiranë-Durrës: 2 viktima dhe një i plagosur
Dy të vdekur dhe një i plagosur. Është ky bilanci i një aksidenti rrugor të ndodhur natën e kaluar në autostradën Tiranë-Durrës. Aksidenti, ku u përfshinë disa automjete, nisi me humbjen e kontrollit të drejtimit të mjetit tip Benz me targa AA 301 AG nga 29-vjeçari Adriatik Bajraktari, me banim në Kamëz.
Mjeti Benz goditi nga prapa një kamion tip Man (me targë koka TR9530P dhe rimorkio TR0881J) dhe si rezultat i përplasjes gjeti vdekjen në spital pasagjeri i mjetit Benz, një 25-vjeçar nga Durrësi me inicialet E.T., ndërsa mbeti i plagosur Bajraktari. Pas goditjes, drejtuesi i kamionit ka zbritur nga mjeti për të parë se çfarë ndodhi, por është goditur nga një tjetër automjet që është larguar me shpejtësi nga vendi i ngjarjes. Si pasojë e goditjes, shoferi i kamionit, 62-vjeçari Sh.B. me banim në Tiranë, gjeti vdekjen në Spitalin e Durrësit.
Në kushtet e errësirës dhe lëvizjes me shpejtësi në autostradë, në aksident u përfshinë edhe dy mjete të tjera, duke shkaktuar dëme materiale. Konkretisht, mjetet tip Nissan me targa AA 894 FF, me drejtues shtetasin A.B. 28 vjeç, banues në Tiranë, i cili ka goditur nga prapa një mjet BMW X5, që kishte ndaluar për t’u dhënë ndihmë të aksidentuarve. Nga dëshmia e drejtuesit të Nissanit rezulton se pas aksidentit të parë, një mjet tip fuoristradë e zezë ka kaluar me shpejtësi dhe është përplasur me hekurat anësore të rrugës.
Policia po punon për identifikimin dhe kapjen e drejtuesit të mjetit që goditi për vdekje shoferin e kamionit, ndërsa ka arrestuar në ambjentet e Spitalit Ushtarak në Tiranë 29-vjeçarin Adriatik Bajraktari, i cili ndodhet nën kujdesin e mjekëve.
