Aktorja Romy Schneider – Ylli tragjik i kinemasë
Më 23 Shtator Romy Schneider do të kishte mbushur 80 vjeç. Jeta e aktores u shenjua nga dallgëzime të forta, ngjitje në maja pastaj rënie tragjike në jetën private. Një retrospektivë.
Romy Schneider ndërroi jetë shumë e re, 43 vjeç, me gjasë nga infarkti, shkaktuar nga ilaçet e shumta dhe alkooli. Miku i saj e gjeti aktoren e njohur në mëngjesin e 29 majit 1982 në tavolinën e shkrimit të banesës së përbashkët në Paris. Shumë vetë thanë atëherë, asaj „i plasi zemra”, duke pasur parasysh goditjet e rënda të fatit dhe ndjekjen hap pas hapi që i bënte shtypi. Por Romy Schneider e shijoi edhe suksesin e madh. Njëherë ajo ka thënë për veten. „Njerëzve u pëlqeu, publikut i pëlqeu, edhe mua më pëlqeu, kam qenë me fat, isha princesha para kameras, isha vazhdimisht princeshë!”
Romy Schneider si Sissi
Ylli i ëmbël i kinemasë gjermane
Që në vitet e para Romy Schneider,që lindi në Vjenë më 23 Shtator 1938 e kërkoi skenën, duke luajtur në krah të nënës së saj Magda Schneider. Karriera e aktores shënoi ngjitje me filmin sentimental „Sissi”, një seri ku Romy Schneider luan rolin e Elisabeth von Bayern, që u bë më vonë perandoresha austriake, e njohur si Sissi.
Romy Schneider íshte ylli i ëmbël i kinemasë gjermane të pas Luftës së Dytë Botërore, ajo u bë e famshme dhe e shijoi famën, derisa ajo e bëri të vuante duke e bërë të largohej në Francë. Doja të largohesha nga një „botë e vogël” ka thënë ajo, dhe në Francë iu duk se do të kishte mundësi për një jetë të re.
Romy Schneider angazhohet nga regjisorë të njohur
Edhe në Francë dhe SHBA, aktorja për një kohë të caktuar u bë yll kinemaje. Filmat e saj me regjisorë si Luchino Visconti, Claude Sautet, Claude Chabrol apo Orson Welles e kthyen atë në një aktore të profilizuar që di të mishërojë karaktere të ndryshme. Në jetën private aktorja nuk e kishte të lehtë.
Romy Schneider me djalin David
Lidhjet e dashurisë dështonin, mediat e ndiqnin si gjahun jetën e saj private. Por më rëndë ajo u godit nga vdekja aksidentale e djalit të saj 14 vjeçar në korrik 1982, nga e cila Romy Schneider nuk e mori më veten. Rreth 60 filma xhiroi aktorja që njihte sipas fjalëve të saj vetëm „gëzim qiellor” dhe „trishtim deri në vdekje”. Jehona e Romy Schneiderit nuk u shua edhe pas vdekjes së hershme, duke e kthyer atë në një figurë mitike të kinemasë.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.