Akuza për Meçollarin: Zbulohet lista e ushtarakëve që i dolën kundër Berishës për Bisht Pallën
Ministria e Mbrojtjes ka zbuluar sot në Komisionin Parlamentar të Sigurisë listën me emrat e zyrtarëve të Forcës Detare që nuk pranuan të nxjerrin Bisht Pallën nga plani i përhapjes së Forcave të Armatosura. Bëhet fjalë për një listë me 16 emra ushtarakësh e firmosur në janar të vitit 2012, kur kryeministër ishte Sali Berisha.
Lista është publikuar pas deklaratave të opozitës dhe ish-kryeministrit Sali Berisha për Artur Meçollarin, një prej negociatorëve në marrëveshjen për detin me Greqinë. Sipas ish-kryeministrit Sali Berisha, Meçollari është agjent i shërbimeve të huaja, por për qeverinë shqiptare të kryeministrit Edi Rama ky është një sulm personal. Ministrja e Mbrojtjes Olta Xhaçka e cila raportoi sot në Komisionin Parlamentar të Sigurisë për procedurat e përzgjedhjes së Meçollarit në grupin negociator tha se sulmi ndaj tij është për hakmarrje.
“Kapiten Meçollari është larguar padrejtësisht nga radhët e Forcave të Armatosura. Meçollari nuk pranoi të firmoste për heqjen e disa bazave detare nga plani i përhapjes. Meçollari nuk pranoi t’ua jepte bazat detare, miqve dhe familjarëve të doktorit kryeministër. Sulmi ndaj Mecollarit kur shtypi shkruante për megaaferat me bazën e Bisht Pallës dhe për shitblerjen e pronave në Porto Romano mes familjarëve të Berishës me Damir Fazllic”, deklaroi Xhaçka në komision.
Sipas saj sulmi i stisur ndaj Meçollarit i kushtoi shtrenjtë dhe vazhdon ta përndjekë edhe sot.
“Sulmi ndaj Meçollarit është hakmarrje personale. Nuk kishte të bënte me agjenturat në kurriz të sigurisë kombëtare. Në 2012, baza e Kepit të Palit u degradua qëllimisht për ta shndërruar në një burim përfitimi për persona privatë Forcës Detare iu kërkua zyrtarisht heqja nga Plani i Përhapjes së Bazës Detare të Kepit të Palit. Meçollari dhe 15 drejtuesit e Forcës Detare nuk iu bindën urdhrave politike”, tha Xhaçka.
