Alibeaj: OSHEE në Kurbin drejtohet nga trafikanti i makinave

Partia Demokratike vijoi me denoncimin e asaj që e cilëson inkriminim i administratës shtetërore nga kryeministri Edi Rama.

Në një deklaratë për mediat, kreu i Departamentit për Rendin dhe Sigurinë, Enkelejd Alibeaj denoncoi emërimin në krye të OSHEE-së së Kurbinit të një personi që opozita thotë se ka qenë kreu i një grupi kriminal që vidhte dhe trafikonte makina.

“Lekë Tuna është kreu i një grupi kriminal që vidhte dhe trafikonte makina, e pikërisht me Edi Ramën u shpërblye duke u bërë drejtori i OSHEE për Kurbinin. Pas një hetimi të gjatë të prokurorisë së Shkodrës ky person u arrestua natën e 5 prillit, nën akuzën e trafikimit të mjeteve motorike”, tha Alibeaj.

Sipas tij, lajmi i arrestimit të këtij personi po mbahet i fshehtë dhe megjithëse nën arrest për vepër penale, Tuna vazhdon të jetë zyrtarisht kreu i OSHEE-së së Kurbinit.

“Inkriminimi i institucioneve nuk ndalet dhe pasurimi i zyrave me trafikantë vazhdon me të njëjtat ritme. Ndërsa Edi Rama krekoset me represionin ndaj të pamundurve, banda e tij në OSHEE vazhdon të dhunojë qytetarët, vazhdon të shtojë radhët me kriminelë me damkë”, tha Alibeaj.

Sipas demokratëve, Rama ndan pushtetin me kriminelë dhe kjo është arsyeja që nuk e ka dashur dekriminalizimin.

“Dekriminalizimi është jetik dhe duhet të zbatohet një orë e më parë që zyrat publike dhe politika të pastrohen nga banditët e Edi Ramës”, mbylli deklaratën Enkelejd Alibeaj.