Alibeaj: Plotësim i godinave të shërbimit mjekësor me kushtet e duhura
Kandidati i PD për bashkinë e Fierit, Enkelejd Alibeaj, takoi banorët e fshatit Lalar. Këta të fundit shprehën indinjatë për braktisjen nga pushteti vendor. Sipas tyre, në fshat përveç mungesës së infrastrukturës rrugore, kanalizimeve, ujit të pijshëm dhe kanaleve kullues, mungon edhe shërbimi shëndetësor.
Alibeaj u tha banorëve se në programin e tij për bashkinë e madhe të Fierit përfshihet plotësimi i godinave të shërbimit mjekësor me kushtet e duhura për këtë shërbim si dhe lobimi i fuqishëm pranë qeverisë për të plotësuar me infermiere dhe mjek çdo qendër shëndetësore në çdo fshat.
Në fshatin Mbrostar, banorët shprehën mbështetje të fortë për kandidatin Alibeaj. “Gjendja ka marrë rrokullisjen dhe kur rrokulliset guri nuk dihet se ku ndalet”, tha një banor Mbrostarit, duke shtuar se, “duhet të mendojmë mirë përpara se të votojmë. Qeveria na ka zhgënjyer të gjithëve këto 2 vitet e fundit”.
Në fshatin Petovë banorët ankohen mes të tjerash edhe për energjinë elektrike. Ata thonë se linja e furnizimit me energji është e improvizuar dhe nuk shërben për një furnizim normal. Nga ana tjetër kultivimi i tokës është tepër i kushtueshëm.
Alibeaj tha në këtë fshat se zona ka një pozicion të favorshëm dhe strategjik për bujqësinë ndaj duhet të shfrytëzohet dhe do të shfrytëzohet si potencial ekonomik. Sistemimi i rrjetit kullues dhe vaditës është një sipërmarrje që bashkia e madhe e Fierit do ta realizojë me pak kosto. Një strukturë e posaçme me mjete do të jenë në shërbim të këtij sistemi në të gjithë fshatrat e Fierit për ta kthyer këtë sistem në funksional.
