Arben Ahmetaj: Raporti i “S&P” rikonfirmon se ekonomia po ecën në drejtimin e duhur

Ministri i Financave, Arben Ahmetaj, ka reaguar përmes llogarisë së tij në Facebook në lidhje meraportin e publikuar nga agjencia botërore e vlerësimit të ekonomive, “Standard and Poor’s”.

Sipas Ahmetaj raporti pozitiv konfirmon edhe një herë besimin se “ekonomia shqiptare po ecën bindshëm në drejtimin e duhur”.

 “Standard and Poor’s, agjensia prestigjioze e vlerësimit të ekonomive në të gjithë botën, ka rikonfirmuar vlerësimin e saj B+ për ekonominë shqiptare, ndërsa parashikimi mbetet pozitiv.

S&P vlerëson se ekonomia shqiptare ka performuar më mirë se vendet e tjera që i përkasin të njëjtës kategori B+, duke veçuar arritjet në drejtim të konsolidimit fiskal, falë edhe programit të suksesshëm me FMN dhe ndërmarrjen e reformave institucionale për të rikthyer sundimin e ligjit, luftuar informalitetin dhe përmirësuar klimën e biznesit.

Nga ana tjetër S&P parashikon konsolidimin dhe përshpejtimin e rritjes ekonomike në periudhën në vijim, bazuar në forcimin e kërkesës së brendshme, si rezultat i rritjes së konsumit dhe investimeve private.

Një tjetër sinjal pozitiv dhe inkurajues që rikonfirmon besimin se ekonomia shqiptare po ecën bindshëm në drejtimin e duhur”, është shprehur ministri në rrjetin social Facebook.