Axhenda e aktiviteteve në kuadër të 8 vjetorit të Pavarësisë së Kosovës

Qeveria e Kosovës do të organizojë një sërë aktivitetesh në 17 Shkurt, 8 vjetorin të Pavarësisë së Kosovës.

Forcat e Sigurisë së Kosovës dhe njësitet e Policisë së Kosovës do të parakalojnë në sheshin e Prishtinës, ndërsa më pas do të zhvillohen homazhe pranë varrit të ish-presidentit Ibrahim Rugova, si dhe pranë varrezave të Jasharajve në Prekaz.

Festa do të vazhdojë në sheshin “Ibrahim Rugova”, “Zahir Pajaziti” dhe “Nënë Tereza”, me interpretimin e Ansamblit “Shota”, që sipas axhendës së Pavarësisë, thuhet të jetë në orën 12:00, dy orë para se opozita e bashkuar të nisë protestën e paralajmëruar për 17 shkurt.

Një aktivitet tjetër do të mbahet në Bibliotekën Kombëtare të Kosovës, në orët e paradites, ku do të promovohet libri “Kosova në Udhën e Pavarësisë”.

Festa në kryeqytet vazhdon në mbrëmje, në Teatrin Kombëtar, ku do të shfaqet Baleti “Dasma”.

Ditën e 17 Shkurtit, delegacionet e larta të institucioneve të Republikës së Kosovës, Presidenca, Kuvendi i Kosovës e Kabineti Qeveritar do të bëjnë homazhe tek varrezat e përmendoreve të dëshmorëve. E pranë komplekseve do të qëndrojnë pjesëtarët e FSK-së.

Për nder të tetë vjetorit të Pavarësisë, më 15 shkurt presidentja e vendit, Atifete Jahjaga pritet të dekorojë me medalje personalitete të shquara.

Ditën e Pavarësisë dhe disa ditë para saj, në komunat e Kosovës do të ketë aktivitete të ndryshme.