Banorët e Krushës bëjnë gati dy padi për Serbinë
Një muaj e gjysmë para se të vije edhe përvjetori i masakrës së Krushës, banorët e këtij fshati do të dërgojnë dy padi ndaj shtetit serb për krimet që ka kryer në këtë vend me 26 mars të vitit 1999.
Këtë për KosovaPress e ka konfirmuar edhe kryetari i këtij fshati, Kadri Dellova, i cili tha se do të ngrenë Padi Penale dhe padi civile.
Aktivistë të fshatit, përfaqësues të lagjeve dhe kryetari i këtij fshati do të mblidhen të shtunën në një takim për të bashkërenduar aktivitetet dhe për të nisur padinë ndaj shtetit të Serbisë.
“Në bashkëpunim me disa avokatë, ne si Krushë e Madhe po përgatitemi për dy padi ndaj pushtetit serb: Padi penale për krime, vrasje dhe gjenocid dhe Padi për dëme materiale”, ka thënë kryetari i fshatit, Kadri Dellova.
Më 26, 27, dhe 28 mars 1999 krushjanët pretendojnë se nga forcat serbe, policore, ushtarake dhe civilë serbë të Hoçës së Madhe dhe të Rahovecit u vranë dhe u zhdukën 241 persona.
Në mesin e të vrarëve janë 7 fëmijë dhe 5 femra, ndërsa, 25 qytetarë u plagosen dhe përjetuan keqtrajtime psikike dhe fizike, si dhe u bë deportimi me dhunë i shumë qytetarëve nga vendlindja e tyre.
Ndërkaq 64 persona ende konsiderohen të pagjetur ndërsa 893 shtëpi private dhe shoqërore u dogjën gjatë kësaj kohe.
Banorët e Krushës, po ashtu përjetuan edhe plaçkitjen, ku nga aty u vodhën shumë pajisje bujqësore, si: Traktorë, motokultivator, automjete të ndryshme dhe pajisje teknike shtëpiake, etj.
Organizatorët e kësaj padie, kanë ftuar në mbledhjen e së shtunës që të marrin pjesë të gjithë njerëzit vullnetmirë, dëshmitarët dhe të gjithë të dëmtuarit nga lufta.
