Basha: Regjistrimi i IMEI, kërcënim ndaj lirisë së shqiptarëve

Një akt të papreçedentë në këto 23 vite dhe kërcënimin më të madh që i bëhet lirisë së shqiptarëve, e konsideroi kryetari i PD-së Basha, vendimin e qeverisë për të marrë të dhënat personale të çdo abonenti të telefonisë celulare.

I pranishëm në kuvendet zgjedhore të degëve 12, 14 dhe 15, Basha kujtoi “në Prill, Gjykata Europiane mori një vendim dhe u tha kompanive celulare, “ju do të dënoheni, edhe po i ruajtët këto të dhëna e jo më t’ju shkojë në mëndje t’ua jepni qeverive”. Ndërsa qeveria këtu u thotë kompanive se do t’ju dënoj po nuk m’i dhatë, u thotë qytetarëve do t’ju gjobis po nuk m’i dhatë të dhënat personale. Ky është kërcënimi më i hapur ndaj lirisë së shqiptarëve në këto 23 vite. Po e bën një njeri i cili ka sjellë deri në parlament krimin dhe kriminelët. Po 3 miliardë dollarët që i falën CEZ-it, nga do dalin. Do të dalin nga xhepat e shqiptarëve”.

Gjithashtu, Basha theksoi se “rilindja e së keqes po trondit çdo familje shqiptare. Rasti më i fundit është ai i mbylljes së filialeve të universiteteve publike dhe universiteteve private, në mungesë të plotë transparence dhe pa asnjë paralajmërim, ku në themel të këtij vendimi, qëndron korrupsioni dhe klientelizmi”.

“Rezultatet e kontrollit ministror që kishte urdhëruar dolën njësoj siç donte sundimtari. Në momentin që arsimi kombëtar priste përkrahjen politike, mbështetje financiare, mbështetje të gjithanshme, vjen dora e dhunshme e paaftësisë, e hakmarrjes, e injorancës. Ky është një projekt diabolik dhe në themel ka korrupsionin dhe klientelizmin, prandaj nuk duhet lënë të ketë sukses. Rilindja e së keqes po trondit çdo familje shqiptare” u shpreh Basha.