Basha tregon kushtet e PD-së
Pas mbledhjes se grupit parlamentar demokrat, kryetari i Partisë Demokratike, Lulzim Basha tregoi tre kushtet e opozitës për mazhorancën. Nesër, tha Basha, është shansi që Rama të reflektojë për zbatimin e Kushtetutës për komisionet hetimore, për dekriminalizimin dhe zbatimin e Kushtetutës për mandatet e deputetëve Leskaj dhe Suli.
“Nuk ka më dallim midis policit dhe banditit, midis kryeministrit dhe kriminelit. Ka katër javë që mazhoranca nuk zbaton vendimin e Gjykatës Kushtetuese. Nesër do të këmbëngulim për zbatimin e këtij vendimi. Nuk bëhet fjalë për emra, por për parime. Parimi është ky: deputetë që janë në proces gjykimi për vepra të rënda penale, nuk mund të jenë pjesë e seancës plenare deri në përfundim të procesit gjyqësor”, tha Basha.
“Duhet t’i jepet fund dhunimit të hapur të Kushtetutës. Vendi është kthyer në xhungël, ka rënë rendi kushtetues”, shtoi kreu i opozitës.
“Edi Rama duhet të zgjedhë: ose avokat i krimit ose reformator i drejtësisë”, theksoi Basha.
