Basha: Xhafaj ministër, po kaloi mbi trupat tanë (A po bën Nishani lojën e PD?)
Që kur kryeministri Edi Rama deklaroi se Fatmir Xhafaj do të jetë ministri i ri i Brendshëm, opozita ka nisur një sulm frontal ndaj tij duke e targetuar si një “hetues të komunizmit” që nuk meriton të jetë në krye të këtij dikasteri.
Në media, sidomos në ato pranë opozitës, kanë nisur denoncime publike ndaj Xhafajt, duke e akuzuar atë se i ka torturuar.
Në këtë linjë, sot kreu i PD-së ka sulmuar Xhafajn nga çadra duke bërë edhe një deklaratë tipike ekstremiste.
“Fatmir Xhafaj do bëhet ministër vetëm po kaloi mbi trupat tanë. Por, ai nuk do të jetë asnjë minutë ministër”, tha sot Basha duke folur tek çadra e PD-së.
“Një njeri që pasi hoqi kostumin e sigurimit të shtetit veshi me vëllain e tij kostumin e trafikantit të kokainës. Ujku qimen e ndërron, por zakonin se harron. ndokush që se njeh mirë historinë e Shqipërisë mund ta pandehë për qengj por ata që e njohin e dinë se është ujk i vjetër. Por sot të zotohemi bashkë se Fatmir Xhafa nuk kalon pragun e ministrisë së brendshme përveçse mbi trupat tanë”, tha Basha.
Në profilizimin e Xhafajt si hetues diktature, duket se shkon edhe protesta e sotme e ish-të përndjekurve politikë. Ata bënë një marshim në rrugën “Murat Toptani” tek Pedonalja kundër emërimit të tij si ministër i Brendshëm.
Ndërkohë, në media kanë nisur spekulimet se presidenti Bujar Nishani mund të luajë lojën e PD-së duke mos e dekretuar këtë kandidaturën e Xhafajt.
