Beqaj: Shërbim pediatrik 24-orësh për gjithë qytetin e Tiranës
Me afrimin e sezonit të verës, për shkak të temperaturave të larta dhe të gjithë problemeve dhe sëmundshmërisë që kanë moshat fëminorë gjatë kësaj periudhe, Ministria e Shëndetësisë ka lançuar planin e ri për shërbimit pediatrik 24-orësh në qendrat e shërbimit parësor të kujdesit shëdetësor në të gjithë qytetin e Tiranës. Ministri i Shëndetësisë, Ilir Beqaj, vizitoi dje pasdite Shërbimin Mjekësor Ambulator të Urgjencës së qytetit të Tiranës, i cili është planifikuar të ofrohet në tre qendra shëndetësore të kryeqytetit. Shërbimet do të ofrohen përkatësisht në lagjën Nr. 8, e cila do ta përfitojë këtë shërbim në Urgjencën e Tiranës pranë Stadiumit “S. Stërmasi”, QSh Nr. 4 që ndodhet tek Unaza pranë Dispancerisë,si dhe QSh. Nr. 6 që ndodhet në Kombinat. “Këtë sezon vere, tha midis të tjerash Beqaj,“përpiqemi të ofrojmë, kryesisht për fëmijët, një shërbim më të zgjatur gjatë gjithë ditës dhe më të shtrirë në qytetin e Tiranës. Me virozat e ndryshme apo problemet që kanë fëmijët gjatë stinës së verës, rezulton që Urgjenca e Pediatrisë brenda QSUT-së mbipopullohet dhe praktikisht, del nga funksioni që ka si qendër universitare, por edhe nuk arrin dot të kryejë siç duhet shërbimin”.
”Ne vendosëm bashkë me drejtuesit e Autoritetit Shëndetësor Rajonal të Tiranës, që në dy muajt e verës, në tre qendra shëndetësore të qytetit të Tiranës, të ketë shërbim urgjence pediatrie çdo ditë, shtatë ditë të javës, edhe kur mbyllet orari normal i qendrave të Tiranës, që është deri në orën 20.00 të mbrëmjes”, theksoi ai.
Duke shpjeguar me tej për mediat hollësitë e planit për mbulimin e këtyre tre qendrave, Drejtori i Shërbimit të ASHR-së Tiranë, Edmond Stojku, tha se “këto tre qendra do të jenë të hapura nga ora 20.00 e mbremjes deri në 07.00 të mëngjesit, me një shërbim që nuk është ofruar deri më sot dhe kjo vetëm këto dy muajt e verës, kur problematikat shëndetësore të fëmijëve janë edhe më të mëdha”. Ai tha se “ne kemi mbyllur një shërbim i cili nuk ishte planifikuar më parë në shërbimin e ASHR Tiranë,” duke shtuar se “Urgjenca e Tiranës, është ajo që do të japë shërbimin maksimal për të gjithë fëmijët në qytetin e Tiranës, duke shërbyer si pika e parë e pritjes, ndërkohë që vetëm rastet më të ndërlikuara do të kalojnë në QSUT”.
