Berat, vidhen 2 milionë lekë në zyrat e minibashkisë
Persona të paidentifikuar kanë grabitur gjatë natës së të dielës zyrat e minibashkisë numër 2, në qytetin e Beratit.
Kanë qenë punonjësit e kësaj minibashkie, të cilët konstatuan vjedhjen mëngjesin e së hënës dhe menjëherë njoftuan policinë.
Burime nga policia e Beratit bënë me dije se, përmes thyerjes së derës kryesore persona ende të paidentifikuar kanë mundur të hyjnë në ambientet e minibashkisë. Vjedhësit kanë hyrë në zyrën e gjendjes civile dhe atë të taksave vendore, ku dyshohet se kanë vjedhur rreth dy milionë lekë.
Ndërkohë, punonjësit e kësaj minibashkie në bashkëpunim dhe me ekspertët hetimore kanë nisur verifikimet në dokumentacionin e rajonit, për të mësuar nëse janë kryer vjedhje në dosjet e kësaj njësie vendore. Hetimet që vazhdojnë për verifikimet e plota të vjedhjes pezulluan sot ofrimin e shërbimeve për qytetarët.
Burime të Drejtorisë së Policisë në Berat bëjnë me dije se është shpallur në kërkim shtetasi me inicialet N.P, i cili dyshohet si autor i vjedhjes së ndodhur. Ndërkohë filloi procedimi penal me akuzën e shpërdorimit të detyrës për Agjentin Tatimor të kësaj minibashkie.
