Berisha: Nuk e njoh vendimin e komisionit Basha-Brava
“PD dhe opozita vendoset për motive kryekëput politike në një situatë në të cilën ndodhet partia opozitare në Mianmar, në Rusi dhe në Teheran.” – Këtë paralele hoqi sot Kryetari i PD-së, Sali Berisha, lidhur me aksionin politik që ka nisur forca më e madhe opozitare në vend për të mbrojtur të drejtat e veta kushtetuese përballë bllokimit nga Qeveria dhe mazhoranca në parlament.
“Siç rezistojnë opozitarët në Rusi, në Mianmar, në Iran, – theksoi Berisha, – do rezistojë edhe PD në Shqipëri dhe ajo e tëra do angazhohet në betejën pa kthim për përmbysjen e narkodiktaturës.
Për sa i përket qëndrimit tim, unë e kam bërë të qartë se përsëri nuk e njoh vendimin. Sepse ky vendim është një akt i turpshëm, një akt i neveritshëm i komisionit Basha-Brava.
Po pse është i tillë?!
Unë këtu kam vendimin e gjykatës për Saimir Tahirin, e cila thotë se nuk mund t’i heqim pasaportën Tahirit, pa marrë lejen e parlamentit. Por ajo gjykatëse nuk ishte një vegël e verbër dhe nuk fshihej pas krimit të vet si Irena Gjoka, e shkarkuar nga Sali Berisha, sepse shkarkimi është akti.
Shteti nuk është hakmarrës. Por shkarkimi është i mjaftueshëm që ajo të shkruajë se jam shkarkuar prej tij dhe nuk mund të trajtoj çështjen. Ky është ligji. Dhe ajo nuk është se e forcon, emërimi, ajo e thellon konfliktin e interesit.
Ajo kishte vetëm një rrugë, të thoshte që nuk marrë dosjen. Por ajo kishte marrë përsipër për arsye që do zbërthehen të gjitha, dosjen e Edi Ramës.
Ndërkohë që një gjykatëse tjetër, po njeri i Kushtetutës dhe ligjit, u thotë prokurorëve që pasaportën nuk mund t’ia marrim pa lejen e parlamentit.
A do mundet Edi Rama me diktaturën e tij të krimit, drogës dhe vjedhjes të qëndrojë në pushtet? Unë kam besim absolutisht që jo.
Ai u hodh në këto veprime pikërisht kur opozita u ngrit në këmbë kundër tij.
Ai e di se në këtë mënyrë nuk mund ta mbajë pushtetin.
Sigurisht që krijon disa vështirësi të përkohshme, por vala e fuqishme e revoltës, e mosbindjes civile të popullit opozitar do i japë atij atë vend që meritojnë të gjithë narkodiktatorët në histori. Ndaj kjo jo vetëm që nuk e dobëson, por e forcon më shumë luftën e opozitës.”
