Kallas: BE ka mënyra për të anashkaluar veton e Hungarisë për Ukrainën

Bashkimi Evropian ka alternativa për të kapërcyer veton e Hungarisë ndaj një kredie prej 90 miliardë eurosh për Ukrainën, por kjo kërkon guxim politik nga liderët evropianë, deklaroi shefja e politikës së jashtme të BE-së, Kaja Kallas, sipas Reuters.

Duke folur përpara samitit të Këshillit Evropian në Bruksel, Kallas theksoi se ekzistojnë opsione për të ecur përpara me ndihmën ndaj Kievit, megjithatë vendimet do të varen nga vendosmëria e vendeve anëtare.

“Ka alternativa, por do të duhet edhe karakter politik nga të gjithë ne,” u shpreh ajo.

Hungaria po përballet me presion në rritje nga vendet e tjera të BE-së për të hequr veton, të cilën kryeministri Viktor Orbán e ka mbrojtur në kuadër të një mosmarrëveshjeje me Ukrainën për një tubacion nafte të dëmtuar nga lufta.

Kallas sugjeroi se furnizimet me naftë nga Kroacia mund të jenë një zgjidhje për Budapestin, ndërsa akuzoi Hungarinë se nuk po vepron “me mirëbesim” në qëndrimin e saj kundër kredisë së miratuar më parë.

Debati mbi ndihmën për Ukrainën dhe unitetin e BE-së vjen në një moment tensioni të shtuar brenda bllokut, ndërsa liderët përpiqen të balancojnë mbështetjen për Kievin me interesat energjetike dhe politike të vendeve anëtare./