SHBA shqyrton zbutjen e sanksioneve për naftën iraniane

Shtetet e Bashkuara të Amerikës mund të lehtësojnë sanksionet ndaj naftës iraniane të depozituar në cisterna detare, në një përpjekje për të përballuar rritjen e fortë të çmimeve të energjisë, të shkaktuar nga lufta në Lindjen e Mesme, deklaroi sot sekretari amerikan i Financave, Scott Bessent.

Në një intervistë për “Fox Business”, Bessent theksoi se Uashingtoni po shqyrton mundësinë e lejimit të shitjes së kësaj nafte tashmë të magazinuar në anije, si një masë për të shtuar ofertën në tregjet globale dhe për të ulur presionin mbi çmimet.

Ai shtoi gjithashtu se SHBA-ja mund të vendosë të lirojë më shumë naftë nga rezervat strategjike, nëse situata e tregut vazhdon të përkeqësohet.

Javën e kaluar, Shtetet e Bashkuara të Amerikës kanë ndërmarrë një hap të ngjashëm duke lejuar shitjen e naftës ruse të depozituar në cisterna, duke sinjalizuar një lehtësim të përkohshëm të sanksioneve ekonomike të vendosura ndaj Rusisë për shkak të pushtimit të Ukrainës./