BSH: Ekonomia vijon trendin pozitiv të rritjes, parashikime optimiste për 2026-ën

Guvernatori i Bankës së Shqipërisë, Gent Sejko deklaroi sot se vëllimi i aktivitetit ekonomik në vend u rrit rreth 3,7% gjatë vitit të kaluar, sipas të dhënave të INSTAT dhe projeksioneve të Bankës Qendrore.

Zgjerimi ekonomik u mbështet nga rritja e konsumit familjar, investimet e sektorit privat dhe rritja e eksportit të shërbimeve. Sektorët e shërbimeve dhe ndërtimit shënuan zgjerim, ndërsa bujqësia dhe industria vijuan të tkurren. Politika fiskale mbeti konsoliduese, ndërsa eksporti i mallrave shënoi rënie.

Guvernatori theksoi se ritmet e rritjes dhe struktura e aktivitetit ekonomik pritet të vazhdojnë në të njëjtën linjë edhe gjatë tremujorit të parë të 2026-s. Faktorë të tillë si bilancet e shëndosha të sektorit privat, besimi i familjeve dhe bizneseve, të ardhurat nga turizmi dhe kushtet e favorshme të financimit, do të mbështesin rritje të qëndrueshme të aktivitetit ekonomik, punësimit dhe pagave.

Sipas Bankës së Shqipërisë, në skenarin bazë, inflacioni pritet të kthehet gradualisht në objektiv gjatë vitit 2026, ndërsa ekonomia shqiptare do të vazhdojë të rritet me ritme solide gjatë viteve në vijim.

Megjithatë, Guvernatori paralajmëroi se konfliktet gjeopolitike në Lindjen e Mesme paraqesin një burim të rëndësishëm rreziku për ekonominë globale dhe atë vendase. Rritja e çmimeve të energjisë dhe pasojat e mundshme për ofertën mund të ndikojnë negativisht në inflacion dhe rritjen ekonomike në të ardhmen.

Në përgjithësi, theksoi Sejko, zhvillimet ekonomike, monetare dhe financiare të muajve të fundit tregojnë se ekonomia vijon të qëndrojë në një trend pozitiv zhvillimi, duke krijuar perspektiva optimiste për vitin 2026.

/e.xh/j.p/r.e/