BSH miraton ndryshimin e emrit të Credit Agricole në Banka Amerikane e Investimeve

Banka e Shqipërisë informoi te premten publikun se ka miratuar ndryshimin e emrit të Bankës Credit Agricole Shqipëri në Banka Amerikane e Investimeve.

Ky ndryshim bazohet në vendimin nr. 73 të datës 7 tetor 2015 të Këshillit Mbikëqyrës të Bankës së Shqipërisë, i cili miratonte paraprakisht zotërimin 100% të pjesëmarrjes influencuese në kapitalin aksioner të Bankës Credit Agricole Shqipëri sh.a., nga Tranzit sh.p.k. Kompania Tranzit sh.p.k kontrollohet nga dy grupet financiare ndërkombëtare: NCH Balkan Fund L.P. dhe New Century Holdings XI, L.P.

Ky transaksion bankar ka rikthyer në tregun bankar shqiptare pas 8 vitesh një bankë amerikane. Në ceremoninë e prezantimit, te Bankës Amerikane të Investimeve, pak ditë më parë, në Tiranë, kryeministri Edi Rama, guvernatori i Bankës së Shqipërisë Gent Sejko e ambasadori amerikan në Tiranë Donald Lu e cilësuan si mesazh optimizmi për ekonominë shqiptare.

Banka Amerikane e Investimeve do të kontrollohet në masën 100% nga një grup financiar me bazë në SHBA, por i fokusuar kryesisht në investime në tregjet e Europës Lindore dhe sidomos në vendet e ish-Bashkimit Sovjetik. Grupi është i pranishëm prej disa vitit 2010, me institucionin financiar “Tranzit”, kompani e specializuar në mbledhjen e kredive me probleme.