Buljeviç: Kroacia do të përkahë Kosovën drejt integrimit euroatlantik

Ministri i Mbrojtjes i Republikës së Kroacisë, Josip Buljeviç, u prit sot me ceremoni ushtarake në Ministrinë e Forcës së Sigurisë së Kosovës.

Gjatë konferencës për shtyp, pas takimit me ministrin e FSK-së, Haki Demolli, Buljeviç theksoi se “Kroacia do të përkrahë Kosovën në të gjitha proceset dhe rrugën e saj drejt integrimit euroatlantik”.

“Prej marrjes së detyrës të ministrit të Mbrojtjes, kjo është vizita ime e parë në një vend tjetër, kjo tregon shumë se çfarë rëndësie ka ministria e FSK-së, për ministrinë e Mbrojtjes së Kroacisë.  Ambicia jonë është që edhe më tutje t’i fuqizojmë raportet tona. Së bashku ne do të promovojmë idenë e demokracisë, stabilitetit dhe paqes. Do të ofrojmë përkrahjen tonë për Kosovën, në të gjitha përpjekjet ndërkombëtare. Do të vazhdojmë me bashkëpunimin tonë në shkollimin e personelit tuaj. Dhe me të vërtetë do të punojmë që raportet tona miqësore që kemi t’i sjellim në nivel vëllazëror”, tha Buljeviç.

Ministri kroat nënvizoi se “do të ofrojmë përkrahjen në të gjitha përpjekjet ndërkombëtare. Do të vazhdojmë të punojmë që raportet tona miqësore t’i sjellim në nivel vëllazëror”.

Ndërsa i pyetur se si e sheh ai Forcën e Sigurisë së Kosovës dhe rrugën e saj drejt transformimit në Ushtri të Kosovës, Buljeviç tha se Kroacia dëshiron që transformimi të ndodhë sa më shpejtë dhe jemi të gatshëm të ofrojmë mbështetje në këtë aspekt”.

Ndërsa, ministri  Demolli u shpreh se “ministria e Mbrojtjes e Kroacisë po e përkrahë arsimimin e kuadrove ushtarake të Kosovës”.

Ministri i Mbrojtjes së Republikës së Kroacisë, Josip Buljeviç, po qëndron sot për vizitë zyrtare në Kosovë. Ai do të vizitojë edhe Qendrën për Studime Universitare (QSU), të FSK-së.