Çështja “Doshi”, Berisha paraqitet në prokurori, hera e parë në 25 vjet
Për herë të parë pas 25 vjetësh, ish-Kryeministri Berisha është paraqitur në organin e akuzës pasi e ka konfirmuar që dje se do të dëshmojë për akuzat e ngritura nga deputeti Tom Doshi. Ftesa për paraqitje, Berishës iu dorëzua pasditen e së premtes.
Pritet që ai të zbardhë çfarë di ai rreth akuzave që deputeti Tom Doshi ka bërë ndaj kryetarit të Kuvendit Ilir Meta.
Pak ditë më parë Doshi e akuzoi publikisht Metën se ka planifikuar vrasjen e tij dhe të deputetit Fufi. Këto akuza janë rrëzuar nga kryetari i Kuvendit, i cili i ka quajtur ato shpifje të pavërteta.
Një ditë pas shkëmbimit të akuzave në sallën e Kuvendit të Shqipërisë të enjten e kaluar lidhur me atentatin që deputeti Tom Doshi pretendon se ishte ngritur disa muaj më parë ndaj tij, kanë raportuar pranë Prokurorisë së Krimeve të Rënda kryetari i Kuvendit Ilir Meta, kryeministri Edi Rama, ministri i Brendshëm, Saimir Tahiri si dhe deputeti tjetër Mark Frroku.
Ndërsa i pari që u pyet rreth kësaj çështjeje ishte deputetit Tom Doshi. Ky i fundit, një ditë pasi publikoi në internet videon dhe fotot nga organizatorët që sipas tij kishin përgatitur atentatin kriminal ndaj tij dhe deputetit tjetër të Kuvendit Mhill Fufi, dëshmoi për disa orë në prokurorinë e Krimeve të Rënda.
