Çollaku: Raporti i KE-së doli nga vlerësimi i shtatorit, 8 kriteret janë të plotësuara
Ministri për Integrim Evropian, Bekim Çollaku, u shpreh i bindur që në fillim të vitit të ardhshëm, Kosova do të hyjë në zonën e shengenit dhe për këtë qytetarët nuk duhet të shqetësohen për zvarritjen e saj.
Në një konferencë për shtyp, në të cilën dha detaje lidhur me raportin përmbyllës të Komisionit Evropian për procesin e liberalizimit të vizave, Çollaku tha se ky raport është i fundit sepse të gjitha kriteret janë plotësuar qind për qind duke e arsyetuar se vlerësimet e këtyre kritereve janë bërë në muajin shtator.
Ministri Çollaku theksoi se nëse dje do të vinte një ekspert, këto tetë rekomandime kanë qenë të plotësuara, por ata nuk kanë ardhur sepse vlerësimet janë bërë në muajin shtator.
Sa i përket kriterit të Demarkacionit me Malin e Zi, Çollaku tha se ai është kriter monitorues.
Ndërsa, për çështjen e luftimit të krimit të organizuar dhe korrupsionit, ai tha se kjo është çështje që nuk përfundon me kriterin e liberalizimit të vizave.
