Delawie: Dhuna në Kuvend kaloi çdo normë

Për ngjarjet e fundit të dhunshme të ndodhura në Kuvendin e Kosovës gjatë seancës së paralajmëruar plenare me rend dite votimin e projektbuxhetit të vitit 2016, ka reaguar edhe ambasadori i Shteteve të Bashkuara në Kosovë, Greg Delawie, për të cilat duke u shprehur nga holli i Kuvendit tha se, “dhuna në Kuvend ka tejkaluar çdo normë dhe këtë, dje nuk e kishim parashikuar”.

“Kuvendi e ka thënë fjalën e tij se është për mbajtjen e seancës, e po ashtu edhe Policia”, ka thënë ambasadori amerikan, duke shtuar se përfaqësuesit e popullit zgjidhen në kuti votimi dhe jo me armë. “Jam shumë i vetëdijshëm se deputetët, qytetarët dhe policia e dëshirojnë një demokraci të mirëfilltë në Kosovë”, është shprehur Delawie.

Ngjarjet që filluan sërish me hedhjen e gazit lotsjellës në e që u pasuan nga përplasjet mes deputetëve opozitarë dhe forcave të policisë sollën atë që lëvizja Vetëvendosje e quajti si lëndim të deputetes Albulena Haxhiu nga dhuna e policisë brenda Kuvendit, e që sipas tyre është dërguar për ndihmë mjekësore.

Ngjarja ka ndodhur teksa deputetët e opozitës u penguan nga punonjësit e sigurisë, që të hynin në sallën e improvizuar për punimet e Kuvendit, ku edhe u miratua në parim projektbuxheti i Kosovës.

Edhe zv.kryeministri Hashim Thaçi dënoi veprimet e dhunshme të opozitës, duke i quajtur ato si veprime të çmendura dhe dhunuese të opozitës. Thaçi tha se askush nuk mund ta bllokojë Kuvendin e Kosovës dhe kërkoi tolerancë zero ndaj veprimeve të dhunshme. Ndërkaq, policia mësohet të ketë arrestuar aktivistin e Vetëvendosjes, Shkëlqim Morina, gjate protestës së tyre jashtë ambienteve të Kuvendit, ku protestues kanë hedhur gurë dhe sende të forta në drejtim të policisë, që është kundërpërgjigjur me gaz lotsjellës.