Dëmshpërblimi financiar për ish-përndjekurit, shtyhen aplikimet deri më 31 dhjetor
Afati i aplikimit për paraqitjen e kërkesave për dëmshpërblim financiar nga ish-të dënuarit politikë do të shtyhet deri më 31 dhjetor 2017.
Ky ndryshim në ligj, u miratua me 75 vota në seancën e sotme të Kuvendit.
Një pjesë e konsiderueshme e kësaj kategorie në vijimësi ka shprehur kritika se nuk ka përfituar dëmshpërblim, për shkak të mosplotësimit të dokumenteve brenda periudhës se përcaktuar në ligj. Në këto kushte, qeveria propozoi që kjo kategori personash të kenë afat për të aplikuar deri në datën 31 dhjetor të këtij viti, kohë kjo që sipas qeverisë është e mjaftueshme që ish të përndjekurit të aplikojnë për dëmshpërblimin.
Deputetja e PS-së, Evis Kushi duke mbrojtur nismën tha se për 24 vite ish të dënuarit kanë arritur të përfitojnë vetëm 20 për qind të vlerës së dëmshpërblimit për vitet e burgut dhe opozita, jo vetëm nuk bëri sa duhet kur ishte në pushtet, por edhe tani nuk po bën as minimumin e mundshëm.
Kjo iniciativë e qeverisë tha ajo është dëshmi e premtimit për mbylljen e të gjitha rasteve për kategoritë parësore në mbylljen e dëmshpërblimit brenda mandatit qeverisës.
