Deputetët e PD te Totozani

Deputetët e Partisë Demokratike Arben Ristani dhe Kastriot Islami u takuan me Avokatin e Popullit, Igli Totozani, për t’i shprehur zyrtarisht shqetësimin në lidhje me vendimin e qeverisë, që detyron qytetarët të japin tek kompanitë celulare IMEI-n, numrin identifikues të aparatit të tyre, ndërsa kompanitë celulare i detyron që me këto të dhëna të informojë bazën e të dhënave, e cila do të ngrihet pranë Ministrisë së Financave.

Sipas Partisë Demokratike, duke patur akses tek IMEI i celularit të çdo qytetari, pa lejen e prokurorisë ose të gjykatës, qeveria do të ketë akses që nga vendndodhja e përdoruesit të celularit e deri tek bisedat telefonike, mesazhet, fotot dhe çdo komunikim që kryhet nëpërmjet celularit.

“Çështja duhet zgjidhur, natyrisht që kemi edhe rrugë të tjera dhe ne i jemi drejtuar Gjykatës Kushtetuese, por shpresojmë që instiucionet e pavarura të kryejnë detyrën dhe të reagojnë. Avokati tha se çështja është më e fokusuar tek Komisioneri për Mbrojtjen e të Dhënave Personale, me të cilin ne do të takohemi. Për ne është e rëndësishme që insitucionet të kryejnë detyrën dhe të denoncojmë këto veprime që kërcënojnë të drejtat e qytetarëve dhe po konsolidojnë këtë oligarki mafioze banditeske”, deklaroi deputeti Ristani pas takimit.

Për këtë arsye, demokratët i kërkuan Avokatit të Popullit të jetë aktiv në mbrojtje të të drjetave të qytetarëve. Partia Demokratike i ka kërkuar edhe Gjykatës Kushtetuese ta pezullojë zbatimin e këtij vendimi të qeverisë, i cili hyn në fuqi të hënën e ardhshme.