Dërgohet për gjykim ish-zv/Drejtori i Policisë së Korçës, Arben Hyseni dhe tre persona të tjerë

Prokuroria e Korçës ka përfunduar hetimet dhe dërgoi për gjykim shtetasin Arben Hyseni, ish-zv.drejtor i Policisë së Qarkut Korçë, si edhe efektivin e policisë, Robert Memelli, të akuzuar për veprën penale të “Kryerjes së veprimeve arbitrare”, parashikuar nga neni 250 i Kodit Penal, në dëm të shtetasit Tomi Misha. Po ashtu, edhe ky i fundit është marrë i pandehur për veprën penale të “Drejtimit të automjetit në mënyrë të parregullt” dhe “Mosbindje ndaj urdhërit të policisë…”, ndërsa vëllai i tij, shtetasi Ernest Misha akuzohet për “Kundërshtim i forcave të rendit publik…”.

Ngjarja për të cilën janë marrë të pandehur këta persona ka ndodhur në datë 20 shkurt 2015, kur shtetasi Tomi Misha ka goditur me automjetin e tij, mjetin në të cilën gjendej zv.drejtori i Policisë së Qarkut Korçë, shtetasi Arben Hyseni. Pas goditjes së mjeteve, efektivi i Policisë Memelli, në prani të zv.drejtorit, ka goditur shtetasin Misha. Vëllai i Tomi Misha, në përpjekje për të ndihmuar vëllain, ka goditur efektivin e policisë Memelli dhe më pas është larguar.

Shtetasi Tomi Misha, i cili pas analizave, ka rezultuar se ka konsumuar alkol mbi normën e lejuar për drejtim automjeti, është shoqëruar pas incidentit në komisariatin e Policisë, ku janë krijuar dyshime të arsyeshme të bazuar në prova se aty është goditur nga shtetasi Arben Hyseni, i cili, për shkak të funksionit të tij, ka pasur lehtësi të hyjë në ambjentet e komisariatit të Policisë Korçë.

Prokuroria e Korçës përfundoi hetimet dhe dërgon për gjykim 4 personat, për akuzat e sipërpërmendura.