“Doshi i lëshoi raport mjekësor vetes”

Pak minuta para mbledhjes së Këshillit për Rregulloren, Mandatet dhe Imunitetin, Spartak Braho, kryetari i Komisionit të Sigurisë denoncoi si të falsifikuar raportin mjekësor të deputetit Tom Doshi, për të mos u paraqitur në këshill.

Sorry, there are no polls available at the moment.Braho tha se, është bërë një mashtrim i ri nga Doshi, kjo pasi raporti është lëshuar nga një mjek, i cili është bashkëshorti i nëpunëses së Marrëdhënieve Publike, në kompaninë e deputetit të Qarkut të Shkodrës.

“Ç’lidhje ka ky mjek me këtë çështje! Mjeku Eduart Shota siç rezulton nga certifikata, është i martuar me zonjën Aureola Shota. Zonja Aureola Shota është punonjëse e “Profarmës” me detyrë nëpunëse e Marrëdhënieve me Publikun. Pra me një fjalë Toma i ka lëshuar raport mjekësor Tomës. Ashtu si video e Tomës me Durim Bamin, ashtu si dhe dëshmia e Petrit Cinarit, që po merrte një apartament dhuratë nga Doshi. Lëshimi i këtij raporti mjekësor është një fakt falsifikimi dhe sajese, dhe prokuroria duhet ti shkojë deri në fund”, tha deputeti i LSI-së.

Këshilli për Rregulloren, Mandatet dhe Imunitetin do të shqyrtonte të hënën, kërkesën e Prokurorisë së Përgjithshme për heqjen e imunitetit të deputetëve Tom Doshi dhe Mark Frroku, për t’i dhënë kështu autorizimin organit të akuzës për t’i arrestuar. Por, marrja e vendimit u shty për sot në rën 18:30.

Doshi paraqiti një raport mjekësor përmes avokatit të tij Vladimir Meçe, ku theksohej se për shkak të gjendjes shëndetësore nuk ishte në kushte të favorshme për të parashtruar para deputetëve mbrojtjen e tij.