Doshi me 2 avokatët hyn tek ‘Mandatet’.
Këshilli për Rregulloren, Mandatet dhe Imunitetin në Kuvend është mbledhur sërish sot pasdite në orën 18:00 për të shqyrtuar kërkesën e Prokurorisë së Përgjithshme për të dhënë autorizimin për arrestimin ose heqjen e lirisë si dhe për të ushtruar kontroll personal dhe të banesës ndaj dy deputetëve, Tom Doshi dhe Mark Frroku.
Mbledhja drejtohet nga N/Kryetari Vangjel Dule. Të pranishëm në këtë mbledhje janë përfaqësues të Prokurorisë së Përgjithshme si dhe deputeti Tom Doshi me dy avokatët e tij, pasi dje ai deklaroi se do të paraqiste mbrojtjen por edhe “fakte rrënqethëse”. Përfaqësuesit e opozitës, si Halimi, Ristani, kanë kërkuar që në krye praninë e medias, sëbashku me deputetin Doshi, por kërkesa e tyre nuk është pranuar menjëherë. Pas debateve të ashpra, mediat janë lejuar të futen.
Ditën e hënë, më 23 mars, deputeti Tom Doshi arriti ta shtyjë mbledhjen e Këshillit për Rregulloren, Mandatet dhe Imunitetin, duke pretenduar se ka probleme me shëndetin. As ai e as deputeti tjetër Mark Frroku nuk ishin të pranishëm në atë mbledhje.
Dje, Doshi njoftoi: “Të mërkurën shpresoj të jem mirë me shëndet dhe në Komisionin e Mandateve do të bëj publik dhe një fakt tjetër rrënqethës, pas të cilit nuk do të mbetet asnjë shqiptar i paqartë për hetimet që janë bërë, si është fshehur e vërteta dhe si janë manipuluar deshmitarët kyç në këtë histori. Me durim deri të mërkurën mbasdite.”
MBLEDHJA NIS ME DEBATE, OPOZITA KERKON MEDIAN. MAZHORANCA ME NE FUND HAP RRUGE
ORA 18:10 Mbledhja ka nisur me debate ndërmjet opozitës dhe mazhorancës, sipas gazetarit Artan Hoxha. Opozita ka kërkuar që ajo të bëhet me dyer të hapura për mediat. Pas kundërshtive, mazhoranca ka lejuar që mbledhja të bëhet me dyer të hapura. Lidhur me këtë fakt, ish-Kryetarja e Kuvendit, Jozefina Topalli, ka vërejtur në Fb se “mbledhja e Këshillit të Rregullores në gjithë praktikën parlamentare është bërë përherë vetëm e hapur”
