Durrës, kapet autori i dyshuar i grabitjes së argjendarisë te “Selvia”
Tre ditë pas grabitjes me armë të argjendarisë te “Selvia”, ku u vodhën dhjetëra kilogramë ar dhe bizhuteri dhe ku mbeti e plagosur pronarja, policia ka vënë në pranga njërin prej personave të dyshuar në këtë ngjarje.
Bëhet fjalë për 23-vjeçarin Andrea Bregasi, i cili është kapur mbrëmë në Durrës i fshehur në një banesë.
Sipas policisë, ky shtetas dyshohet se ka grabitur argjendarinë e Olta Sinanajt më 6 gusht, vajza e të ndjerit Rrapo Sinanaj, i cili është vrarë para disa kohësh gjatë një grabitjeje nga vrasësi i arrestuar tashmë Viktor Gushi.
Në momentin e ndërhyrjes, policia nuk ka ndeshur në rezistencë dhe i dyshuari nuk ka qenë i armatosur. Në oborrin e banesës ku ishte fshehur 23-vjeçari, policia ka gjetur dhe sekuestruar edhe motorin që ishte përdorur në grabitjen e gati 50 mijë eurove mall në argjendarinë e Olta Sinanajt, e cila mbeti edhe e plagosur nga goditja në kokë me qytën e pistoletës.
Për të identifikuar mjetin, policia është ndihmuar nga pamjet e kamerave të sigurisë, duke parë detajet e motorit që u përdor në grabitje nga dy autorët e maskuar me skafandra në kokë.
Dëshmia e 23-vjeçarit të ndaluar, pritet të jetë vendimtare për policinë për të kapur dhe personin e dytë të përfshirë në grabitjen e argjendarisë në mes të ditës në Tiranë.
