Eksodi i kosovarëve, një fëmijë 18 muajsh vdes gjatë rrugës për Hungari

Një fëmijë 18 muajsh ka ndërruar jetë në kufirin Serbi-Hungari teksa ai së bashku me familjen e tij po përpiqeshin që të kalonin ilegalisht kufirin për të shkuar në Evropë.

Fëmija është nga fshati Begunc e komunës së Vitisë dhe besohet se ngjarja ka ndodhur dy ose tri ditë më parë.

Këtë e ka konfirmuar kryetari i fshatit Begunc, Azem Baliu i cili tha se familjarët e viktimës të cilët gjenden në Hungari tashmë në bashkëpunim me Ambasadën e Kosovës në Budapest dhe zyrtarë të Ministrisë së Jashtme të Kosovës, po bëjnë përpjekje që trupin e pajetë të fëmijës ta kthejnë sa më shpejt në Kosovë për ceremoninë mortore.