Ekspozita e artistëve shqiptarë në Torino

Kompleksi i Pallatit Mbretëror në Torino qe skenari i ekszpozitës së dy prej artistëve shqiptarë më të njohur në panoramën kombëtare dhe ndërkombëtare.

Helidon Xhixha dhe Alfred Mirashi, në art Milot, tërhoqën një publik elitar koleksionistësh e dashamirësish arti të ardhur nga vende te ndryshme për të admiruar veprat e atyre që tanimë konsiderohen dy maestro të artit bashkëkohor.

Përveç autoriteteve vendase, i pranishëm në këtë ekspozitë ishte edhe drejtori i Muzeut Historik Kombëtar, zoti Melsi Labi.

“Është një kënaqësi shpirtërore të ndjekësh këta artistë të njohur dhe shprehës të vlerave kulturore shqiptare. Ndodhem këtu sepse Muzeu Historik Kombëtar duhet të mbështesë kulturën kudo që ajo paraqitet nga artistët shqiptarë”, u shpreh Labi.

Ekspozita, e organizuar nga Instituti Kombëtar i Artit Bashkëkohor, është një hap i mëtejshëm i dy artistëve që janë formuar në Akademinë e Brerës në Milano.

Veprat monumentale të Helidon Xhixhës tanimë zenë vend në koleksionet, muzetë dhe sheshet më të rëndësishme në vende të ndryshme të botës, nga Majemi në Zvicër, nga Rusia në Emiratet e Bashkuara.

Në Bianalen e fundit në Venezia instalacioni madhështor në Kanal Grande jo vetëm që mahniti publikun, por përcolli edhe një mesazh të fortë mbi mbrojtjen e mjedisit.

Ciklet në pikturë e skulpturë të Alfred Mirashit, i njohur në art me emrin Milot, kanë kapërcyer prej vitesh kufijtë e Italisë dhe janë ekspozuar nga Londra në Pekin, nga Berlini në Nju Jork.

Veprimtaria e tij artistike ka marrë një hov të mëtejshëm dhe një vlerësim akoma më të madh të kritikës e publikut ndërkombëtar me krijimin e serisë së skulpturave me në qendër çelësin, simbol i hapjes dhe i bashkjetesës.