Elezi: Nuk mjaftojnë mjetet për planin aksionar të Strategjisë për zhvillim rajonal në Maqedoni
Decentralizimi në Republikën e Maqedonisë zbatohet një dekadë e gjysmë, ndërsa prioritet i komunave edhe më tej mbetet sigurimi i financave më të mëdha dhe më shumë mjete në nivel rajonal. Këto janë konkluzionet e konferencës së sivjetme “Rikrijim i decentralizimit: Promovimi i politikave koherente për zhvillim të qëndrueshëm lokal në Republikën e Maqedonisë”. Organizator është Ministria e Vetëqeverisjes Lokale në bashkëpunim me OSBE-në, përcjell Telegrafi Maqedoni.
Ministrja e Vetëqeverisjes Lokale Shiret Elezi theksoi se politikat për zhvillim rajonal dhe lokal, vendi jonë i ndërton në bazë të qëllimeve globale të KB-së dhe përcaktimit për anëtarësim në BE. Elezi përkujtoi se në raportin e fundit të Komisionit Evropian, lidhur me politikën e zhvillimit të barabartë rajonal është vërejtur progres, njofton AIM.
“Vlerësohet se Plani aksionar i Strategjisë për zhvillim rajonal i Republikës së Maqedonisë për periudhën 2016-2019 parashikon shpërndarje më transparente dhe më të balancuar të mjeteve buxhetore në rajonet planore. Konstatohet se në buxhet për vitin 2016 dhe 2017 mjetet janë rritur dyfish por se ato ende nuk janë të mjaftueshme”, theksoi Elezi.
Me këtë konstatim, siç tha, në përgjithësi dakordohemi edhe pushteti qendror edhe ai lokal, si rezultat i të cilave në dy vitet e fundit vërehet trend i rritjes së dyfishtë të mjeteve për zhvillim të barabartë rajonal, me tendencë rritja të vazhdojë.
