Mbështetja nga IPARD i dha mundësi Erlisit nga Krutja e Lushnjës të kryejë investime bashkëkohore në serrat e tij, ku kultivon perime. Ministrja e Bujqësisë dhe Zhvillimit Rural, Frida Krifca solli sot shembullin e fermerit Erlis Allkanjari, i cili prej 15 vitesh merret me kultivimin e perimeve në serra.
“Erlisi ka ndërtuar një serrë moderne me sipërfaqe 8.8 dynymë, ku mbjell perime të ndryshme të sezonit, me cilësi të lartë dhe të sigurta për konsumatorin, të garantuar nga investimet bashkëkohore në serrë përmes mbështetjes nga programi IPARD”, u shpreh Krifca në rrjetet sociale.
Erlisi është përfitues nga programi IPARD II për masën ndërtim serre, sistem vaditës. Ai tregoi se investimet e kanë modernizuar serrën e tij, me hapje nga lart dhe prodhimin e domateve aktualisht e ka nxjerrë në tregun vendas, në Tiranë.
Ai tregon se cilësia e domates ka qenë shumë e mirë. Erlisi thotë se për zonën e Myzeqesë bujqësia është e ardhmja, pasi edhe fitimi është i lartë.
Komentet
Bëhu i pari që komenton!
Lini një Koment të Ri
Për t'u përgjigjur një komenti specifik, kliko butonin 💬 Përgjigju poshtë atij komenti.